Jöklabúskapur

2011-12-20T16:22:00.000Z

Meira mont

2011-12-20T16:09:00.001Z

2011-12-20T00:31:00.001Z

Þetta mun Bjúgnakrækir setja í skóna hjá þægu strákunum á Sjafnargötunni!

Heimasaumað af miklum vilja en lítilli kunnáttu :)

Bjúgnakrækir

2011-12-20T00:23:00.002Z

Þetta mun Bjúgnakrækir setja í skóna hjá þægu strákunum á Sjafnargötunni!

Heimasaumað af miklum vilja en lítilli kunnáttu :)

Elsku snjór

2011-12-02T11:11:00.003Z

Get ekki annað en elskað snjóinn og frostið og þessi tvö á myndinni líka (mynd frá síðasta vetri!). Nú fer skíðatíminn vonandi alveg að skella á.

Eldavélin

2011-11-22T12:44:00.002Z

Gleymdi alltaf að setja þessar myndir inn en þetta hér að ofan breyttist í þetta hér að neðan í júní síðastliðnum og jók eldunar- og bökunaránægju okkar um allan helming!

Svör

2011-11-22T12:42:00.002Z

Þið voruð nú bara asskoti dugleg að giska, kannski þeir séu ekki svo líkir ;) Svörin eru svona:
1.ÓK
2.ÓK
3.ÓK
4.ÚJ
5.ÚJ

svo það var Iðunn sem grísaði á rétt svör. Þess má geta að ef ég þekkti ekki myndirnar og aðstæðurnar og fötin þá er ég hrædd um að ég væri ekki alveg viss!

Hver er hvor?

2011-11-16T09:27:00.003Z

1.mynd

Ég fæ oft að heyra það hvað strákarnir séu líkir. Mér finnst þeir auðvitað mjög ólíkir að utan sem innan en var svo aðeins að taka til í tölvunni og rakst á nokkrar myndir þar sem mér finnst þeir dálítið bera þess merki að vera undan sömu foreldrum. Hér er því getraun!

2.mynd

3.mynd

4.mynd

5.mynd

Hvor sjafnargötuguttinn er á hvaða mynd?!

Hjóladagur

2011-10-16T22:57:00.003+01:00

Óli Kalman líka að hjóla á nýja hjólinu sínu (2 ára afmælisgjöf) og rak mig áfram!

Á fullri ferð!

Stoltur og glaður!

Ég held ég muni líklega ofgera einhverjum núna með þessu "eiginbarnamonti" en ég vona eiginlega bara að þeir sem nenna ekki að lesa sleppi því og held reyndar að flestir lesendur þessarar síðu séu ömmur og aukaömmur og stórfrænkur svo þetta ætti að sleppa :)

Úlfar Jökull er búinn að læra að hjóla á hjálpardekkja. Búinn að læra að fara sjálfur af stað og stoppa sjálfur og hjóla og bremsa og beygja út um allt o.s.frv. Þetta uppátæki var alls ekki frá mér komið, mér hafði ekki dottið þetta í hug, hann heimtaði sjálfur að hjálpardekkin yrðu tekin af hjólinu hans og við sættumst á áð prófa smá en sögðum honum að við myndum örugglega setja hjálpardekkin aftur á og svo prófa aftur seinna en svona fór þetta.

Hann kynnti sér og vildi vita allt um heitavatnsrörið sem liggur frá Nesjavöllum (sáum það í bíltúr í dag) og hvaðan heita vatnið kæmi og hvernig væri inni í rörinu og svo í kjölfarið fór hann að spegúlera hvaðan kalda vatnið kæmi svo ætli við verðum ekki að fara í kynnisferð í Gvendarbrunna fljótlega ;) Hann vill líka vita af hverju strákar eru með pung og líka hvernig börnin komast í magann á mömmu sinni, hólí mólí!

Tveggja ára Óli Kalman

2011-09-22T23:12:00.005+01:00

Þessi litli moli er tveggja ára í dag!

(myndir teknar síðustu helgi í réttum)

Hættur með bleyju fyrir tveimur mánuðum síðan á koppnum á gólfteppinu á ganginum sem nú er horfið undir parkett jei jei jei (ekki hringlaga mottan sem Iðunn gerði heldur skítuga, gamla og gráa teppið undir!)

Sumarfrí 2011

2011-09-22T00:32:00.002+01:00

Ekki veit ég af hverju mér datt í hug að gera þetta akkúrat núna í kvöld en ég er búin að ætla að gera þetta frá því í sumar. Við fórum í sumar í næstum 2 vikna æðislega tjaldferð og tókum norðausturhornið nokkuð vel fyrir. Það kemur ekki fram á þessu korti en við hófum ferðalagið á að keyra Kjöl og fá smá miðhálendisfíling. Við gistum í tjaldi á Hveravöllum, Skagafirði, Eyjafirði, við Mývatn, Húsavík, Ásbyrgi, Vopnafirði, Þórshöfn, Vaglaskógi og Akureyri og hittum margt snilldarfólkið! Ég verð eiginlega að tjá mig um þetta einhvern tímann aðeins betur og setja inn myndir...

Smalamennska

2011-09-20T13:29:00.002+01:00

Það voru nú ekki mikil viðbrögð við myndunum hér í síðustu færslu en áfram heldur samt kojuvinnan. Núna er það að rúmföt og lök sem ég er að skemmta mér við að sauma. Reyndar vorum við að koma frá smalamennsku og réttum í Árneshreppi þar sem Eyfi hljóp upp um öll fjöll en ég hljóp upp um eina hlíð og það passaði fínt :)

Svo er tveggja ára afmæli í vikunni og alls kyns gleði...

Kv. Auður Agla

Afrakstursmyndir - kojan álagsprófuð

2011-09-13T13:17:00.003+01:00

Ég setti ægilegan montstatus á fésbókina en fannst allt í einu að það væri hálfglatað að hafa aldrei myndir til að sýna útkomurnar svo ég ákvað að setja þetta hér.

Kojan var álagsprófuð í fyrradag þar sem hún stóð á miðju stofugólfinu. Úlfar Jökull tók að sér að framkvæma prófið, alveg óumbeðin og af einskærum áhuga. Hans mestu heilabrot höfðu verið um hvernig stiginn yrði og hann tilkynnti mér þegar hann sá stigann að stiginn væri alveg eins og hann vildi hafa hann -líklega eins gott! Álagsprófið tók hátt í klukkutíma og fólst í að klifra upp og niður stigann að innanverðu og utanverðu og hanga og/eða standa á sem flestum spýtum. Niðurstaðan var mjög góð, þessi koja er rosa massíf og lítur út fyrir að þola ýmislegt...

Þriðja parið af svona inniskóm sem ég geri núna í september, fyrstu voru hobbitalegir í meira lagi, aðra fékk Úlfar Jökull mjög glaður og þessa þriðju ætla ég að eiga líka. Fjórðu verða svo handa Óla Kalmani næstu daga. Uppskriftin var upphaflega einhver útlensk uppskrift af netinu en hún var glötuð svo ég breytti þessu eftir mínu höfði og þróaði.

Krækiberjasaftskammturinn fyrir komandi vetur er kominn á flöskur:

Eyjafjallajökull

2011-09-07T09:39:00.003+01:00

Eyfi þurfti að fara í vinnuferð núna í lok ágúst og vantaði vinnudýr svo hann kippti mér með enda sá fyrir skemmtilega ferð. Við slengdum strákunum í pössum með næstum engum fyrirvara til ofurÁsuömmu og afaÓla og brunuðum austur á miðvikudagskvöldi. Árla fimmtudagsmorguns var lagt af stað upp á snjóbíl sem tók nú sinn tíma en síðan íssjármældum við öskjuna í Eyjafjallajökli og nutum lífsins í geggjuðu veðri. Komum síðan niður af jökli að kveldi og vorum komin í bæinn eitthvað aðeins eftir miðnætti. Læt myndirnar tala sínu máli...

Gosstöðvarnar frá því 2010

Engar myndir

2011-08-30T15:57:00.002+01:00

Ég er orðin eitthvað svo föst í því að ég geti ekki bloggað nema að ég hafi myndir. Nú hef ég engar myndir til taks en ákvað samt að henda inn einni færslu, mest fyrir mig :)

Tvö ágæt ÚJE orð:
himúin = hinu megin slegið saman í eitt orð
foga = þvo (einfaldlega af því að f og þ hljómar frekar svipað í upphafi orðs og þegar maður heyrði ekki mikið sökum vökva í eyrum)

Ég er byrjuð að vinna á fullu, en tómstundaheilinn minn sýnir enga tillitsemi og mig langar að prjóna og sauma og stússast í myndum allan daginn! Ég er samt alltaf með eitthvað á prjónunum og plana að breyta einni skyrtu sem ég á og líka þarf ég að finna mér næsta málningarverkefni... En ég er búin að gera oggu ponsu rifsberjasultu og tvær gerðir af bláberjasultu og týna nokkra sveppi til að eiga til vetrarins.

Sveitastrákar 2011

2011-08-19T10:12:00.002+01:00

Einn ánægður við akstur Ferguson!

Nei, tveir ánægðir Fergusynir

Smá heyskapur, er ekki örugglega heyjað í þokusúld líka? Þokusveitin stendur undir nafni...

"ééég lííííííkaaaaaa"

Sveitastrákar

Sumar 2011

2011-08-19T10:00:00.002+01:00

Hér verður haldið áfram að blogga í vetur og hellingur af myndum sem bíður þess að fá að sýna sig á síðunni!

Kirtlataka og rör

2011-07-08T17:35:00.002+01:00

Jæja! Nú er lokið margra vikna (ef ekki mánaða) tímabili líkamlegrar heyrnaskerðingar hjá Úlfari Jökli. Þessi líkamlega heyrnarskerðing lýsti sér í þúsund og trilljón "ha?" og "hvað segirðu?" sem við Eyfi og ömmurnar og leikskólinn og allir voru orðnir dálítið þreyttir á (fyrir utan frekar háværa hegðun og háværan talanda). Í gær fór hann neflilega í eina litla svæfingu þar sem nefkirtlarnir voru teknir vegna nefmælgi og hrota og rör voru sett í eyrum því þau voru stútfull af slími og vökva, án þess að við höfum nokkuð orðið vör við neitt eyrnavesen hjá honum. Eftir stendur andleg eða "selectíf" heyrnaskerðing en hann er alls ekki sá eini á sjafnó sem þjáist af henni og vel getur verið að Úlfar hafi erft hana frá einhverjum (lesist pabba sínum!).

Þess má nærri geta að Úlfar Jökull sá sér ekki fært að vera rólegur og jafna sig eftir svæfingu og aðgerð nema í um 1 klst eða svo og þá var hann kominn út á tún og farinn að hlaupa. Hann átti víst ekki að fara í leikskólann í dag en kl.10:30 gafst ég upp á að hafa hann heima hlaupandi upp um allt og hendandi sængum og fór með hann á Grænuborg svo ég gæti málað smá því við erum að mála svefnherbergið okkar :)

En í gærkvöldi fékk hann að tala við Ásu ömmu sína í síma og það sem litli snúðurinn þurfti að segja henni var: "Amma, núna heyri ég!!!"

sumar...

2011-06-30T14:06:00.005+01:00

Úr vinnuferð á Reykjanesi

Snæfellsjökull séður frá Reykjaneshælnum

"handahlaup"

Í fyrstu tjaldferð sumarsins

Ég sé ekki betur en þessi drengur sé þokkalega ánægður með aðstæður!

Sauðburður 2011

2011-06-03T11:01:00.006+01:00

HLAUPABÓLA!

2011-06-03T10:26:00.004+01:00

Drengirnir á Sjafnó ákváðu að taka hlaupabóluna með trompi! Úlfar Jökull reið á vaðið daginn eftir 3 ára afmælið sitt og kláraði þetta á 5 dögum að mestu, þar af voru tveir frekar erfiðir sólarhringar. Óli Kalman gerði bara slíkt hið sama, nákvæmlega tveimur vikum seinna og hefur verið aðeins lengur að jafna sig. Ég hélt að Úlfar Jökull hefði sýnt mjög góðan bóluárangur með bólum í lófum og iljum og nafla og eyrum og um það bil alls staðar en Óli Kalman gaf ekkert eftir, sérstaklega varðandi "intensivitet" bólanna. Myndirnar tala sínu máli en eru ekki fyrir viðkvæma ;)

Mikið að gera í maí

2011-05-30T09:50:00.002+01:00

Það hefur verið ótrúlega mikið að gera núna í maí og ég ætla að hrúga hér inn nokkrum færslum og myndum á næstunni. Af undanförum atburðum má nefna 3 ára afmæli, sauðburður á Krossnesi, nýtt gólfefni á eldhús (við lögðum það ekki samt), ný rafmagnstafla og "nýtt rafmagn" á Sjafnó og ónýt eldavél, sveitaferð hjá Úlfari Jökli í leikskólanum, slatta vinna, eldgos, kryddplönturæktun og gróðursetning á alls kyns fræjum og plöntum!

3 ÁRA SNILLINGUR

2011-05-11T08:45:00.001+01:00

Legoland

2011-05-11T08:39:00.002+01:00

Ég flýtti mér svo að henda inn Legolandsmyndum á mánudaginn og svo að undirbúa 3 ára afmælið hans Úlfars Jökuls að ég gleymdi að skrifa um þessa ferð. Við fórum sem sagt í Legoland með öðrum 180 félögum í SKB (styrktarfélagi krabbameinssjúkra barna) í dagsferð. Þetta var ótrúlega flott og vel heppnað í alla staði og Icelandair, IGS, N1, A4 styrktu þessa ferð öll og áhöfnin, þ.e. flugmenn og flugfreyjur gáfu vinnu sína og voru æði. Við vorum alveg í skýjunum með þennan dag og hann verður lengi í minnum hafður :)

LEGOLAND!

2011-05-09T10:46:00.005+01:00

SKB-blaðið

2011-04-19T10:08:00.002+01:00

Fyrir löngu kom þetta blað út og ef einhver hefur ekki séð og hefur áhuga þá er þetta núna á netinu. Skrítið hvað mér finnst langt síðan en samt man ég þetta allt svo vel, á hvað ég horfði út um spítalagluggana, hvaða setningar einhver sagði, hver kom í heimsókn á spítalann og hvað við borðuðum... Skrítið.

Mamman með óuppalda krakkaorma...

2011-04-17T14:04:00.004+01:00

Fyrir viku síðan fór ég, með strákana, í rúnt til Keflavíkur til að sækja Eyfa úr flugi. Ég hafði kíkt á flugáætlunina áður en ég fór og sá að flugvélin hans Eyfa átti staðfesta lendingu um kl.16. Ég keyrði frekar rólega því það var dálítið hvasst og stundum tók hressilega í bílinn.

Svo komum við í Leifsstöð og sátum úti í bíl að horfa á flugvélarnar. Stuttu seinna lenti Eyfi og við hringdumst á. Hann sagði mér að þau færu ekki frá borði fyrr en eftir allt að því 30 mín því það væri verið að sækja rútur til að ferja farþega inn í flugstöðina því það var ekki hægt að nota landgangana í rokinu. Við vorum enn inni í bílnum en ég varð aðeins að leyfa strákunum að standa upp og hreyfa sig. Svo ég stappaði í mig stálinu, fann bílastæði, úthugsaði aðferð til að koma þeim inn og kýldi á það. Ég hélt rígfast á þeim, hvorum á sínum handleggnum og hljóp inn! Þetta tókst en stundum var ég ekki viss um að ég kæmist næsta skref á móti rokinu. Þegar við komum inn var ég eins og hálfviti, rennandi blaut af rigningu, með hárið út um allt og móð og másandi!

Og eitthvað voru strákarnir fegnir að fá að hreyfa sig og eitthvað greip þá nett víðáttubrjálæði þarna í Leifsstöð því þeir fóru strax að skoða sig um út um allt. Ég hitti þarna stelpu sem ég kannast við (sem var eina þæga og rólega stelpu) og ég var eitthvað að reyna að tala við hana en það gekk ekkert mjög vel sökum þess að strákarnir voru eiginlega komnir út um allt. Það er þarna 10-11 verslun og þar var hægt að skoða ýmislegt, m.a. banana sem þeir sáu ástæðu til að hlaupa með út um allt og henda á gólfið. Ég get rétt ímyndað mér hvað fólk hélt um mig og uppeldi mitt á þessum tveimur ormum. Við fórum yfir í innritunarsalinn því þar var næstum enginn (og engir bananar) og skárra að hlaupa þar. Og ég veit ekki alveg hvurs lags náttúrulögmál það er en alltaf tókst þeim að hlaupa hvor í sína áttina. T.d. missti ég Óla Kalman í einu sinn fyrir horn á innritunarborðum og ég hljóp á eftir honum og fyrir hornið og sá engan. Ég fékk nett panik og byrjaði að skima í allar áttir, en þá var mér bent á hann þar sem hann var skriðinn vel inn á farangursfæribandið... Og auðvitað var ÚJE svo kominn í hinn enda salarins á meðan!

Svona gekk þetta þar til Eyfi hringdi og ljóst var að hann væri ekkert að koma, heldur yrði fastur í flugvélinni í margar klst og ég yrði bara að fara heim. Ég komst heim með grenjandi stráka (því það var svo gaman á flugstöðinni) í rokinu og Eyfi komst líka heim að lokum og ég get hlegið að þessu öll saman núna en ég skammaðist mín töluvert á meðan á þessu stóð, sem mamman með tvo krakkaorma sem hún réð ekkert við og voru gjörsamlega óuppaldir! Hressandi sunnudagsrúntur...

Myndir úr bústaðaferð með Gústa og Oddnýju í feb

2011-04-06T12:59:00.003+01:00

Litlu ofurdúllurnar bara rólegar að leika sér

Stærri gríslingarnir ekki alveg jafn yfirvegaðir (og Úlfar Jökull stórglæsilegur til fara!)...

Skíðamyndir!

2011-04-06T12:56:00.003+01:00

Mömmuvika framundan

2011-04-04T11:08:00.005+01:00

Ohh meeeen Ég var búin að skrifa heila færslu og síðan hvarf hún! drasl! Anyway, grasekkjutíð hjá mér á næstunni þar sem Eyfi stakk af til Innsbruck og Vínar. Honum verður samt fyrirgefið þar sem hann fór m.a. til að kaupa handa mér uppáhalds dökka súkkulaðið! Ég fór í gær með Úlfari Jökli og Ásuömmu í snilldar skíðaferð í Bláfjöll, ég held að það að fara á skíði sé með því allra skemmtilegasta sem ég geri og eitthvað virðist Úlfar vera á svipuðu máli (myndir munu koma). Svo langar mig að vera heima og búa til rúmgafl og sauma gardínur og hengja upp myndir í stað þess að basla í vinnunni og reyna að læra...

Kvöldmatur á Sjafnó

2011-03-29T16:49:00.002+01:00

Ég ætlaði bara að kynna lesendum þessarar bloggsíðu fyrir alvinsælasta kvöldverði heimilisins:

SKYR MEÐ FISKIBOLLUM SKORNUM ÚT Í !

Hvað er málið með tímann

2011-03-25T15:46:00.002Z

Hvað er eiginlega málið með tímann? Af hverju finnst mér tíminn alltaf líða svo hratt (eins og flestum finnst held ég) en samt hlýtur hann að líða mjög "venjulega" og bara á þeim hraða sem hann hefur alltaf gert, ekki satt? Eftir 20 og eitthvað ár á lífi ætti ég að vera búin að venjast tímahraðanum en það er nú alls ekki svo. Mjög skrítið mál!

Við Óli Kalman erum tvö heima þessa helgina á meðan orkuboltarnir eru að rýja fé og gefa því hey. Það er því afar rólegt á Sjafnó núna og örugglega afar skemmtilegt í sveitinni.

Það eru reyndar tímamót þessa helgina hjá mér, ég er að fara að spila á tónleikum, jei jei jei í fyrsta skipti í x langan tíma! Víólan mín er svo skemmtileg og svo eru líka skemmtileg verk og skemmtilegt fólk svo þetta er alveg eðal. Og svo eru smám saman að vakna fleiri skemmtilegar spilahugmyndir og ég er búin að skipta um þrjá strengi og allt :D

Góða helgi

Fimmtudagur

2011-03-10T15:23:00.002Z

Þetta er litli fótbrotni snúðurinn, ekki besta mynd í heimi en brosið stendur fyrir sínu

Þetta er nokkuð algeng staða á heimilinu þessa dagana þegar allir eru þreyttir á kvöldin og Eyfi er að elda matinn. Svona er hægt að halda öllum góðum og status á rólegu plani tiltölulega lengi

Ein úr Eyjafirði síðan um daginn

Hressandi vika

2011-03-04T22:16:00.002Z

Það er hressandi vika að baki hjá mér. Búin að vaka fram á nætur að gera minn fyrsta póster úr mastersnáminu og undirbúa stuttan fyrirlestur um pósterinn og kynna þetta á evrópudegi framhaldsnema í jarðhitarannsóknum sem var haldinn hér á Íslandi. Svo er ég farin að spila á víóluna á 1 æfingu á viku og svo var starfsdagur í 1 leikskóla og sundnámskeið og skóli hjá mér og leikfimi o.s.frv. Það bara rifjast upp gamla manían sem ég var í hérna á mínum yngri árum... :)

Notaleg helgi framundan hjá okkur og passlega lítið um plön
Góða helgi
Auður Agla

Sundmyndir!

2011-02-21T11:40:00.003Z

Þetta er sett hér inn fyrir sundáhugafólkið í fjölskyldunni þar sem þessir drengir vilja ekkert alltaf sýna sínar bestu sundhliðar fyrir fjölskyldumeðlimi. Það eru aðallega við Eyfi (og sem betur fer líka kennarinn í sundskólanum) sem sjáum þessi glæsilegu tilþrif þeirra og segjum af þeim frægðarsögur sem örugglega fæstir trúa eeeeen hér með er þetta staðfest á myndum.

Pollrólegur yfir þessu eins og öðru :)

Óli Kalman á bólakafi!

" Sjáiði sundtökin!"

Ég veit ekki alveg hvað fagfólkið segir um aftari höndina á þessari mynd en kannski var hann bara að láta sig renna í bakkann ;)

Bloggsíðan mín

2011-02-21T09:56:00.002Z

Miðað við gleði og almennt brall síðustu 10 daga er ótrúlega mikil þögn hjá mér hérna á blogginu. Samt er það svo að í hvert sinn sem ég er búin að blogga þá hugsa ég "humm, vá hvað þetta var skemmtilegt, best ég bloggi bráðum aftur!" Og hvað gerist svo? Svona 2 vikna pása, glatað!

Við vorum um síðustu helgi í Skíðadal hjá Óliver, Helgu og Urði vinum okkar og það var náttúrulega bara dásamlegt. Dagskrá laugardagsins var heljarinnar skíðaferð í Hlíðarfjall með hele familien. ÚJE hélt áfram að fara á kostum og eftir rúmlega 4 klst skíðaiðkun var hann dreginn af svæðinu og í bílinn öskrandi yfir því að fá ekki að vera lengur á skíðum! Fyrst hann hefur úthald í þetta núna 2 ára (bráðum þriggja) þá veit ég ekki alveg hvernig hann verður eftir 10 ár...

Óli Kalman stækkar og stækkar og er farinn að hafa sitthvað til málanna að leggja. Honum finnst eiginlega best að vera hjá afa sínum og skoða bíbí eða kíkja í potta í eldhúsinu en finnst þessi skíðamanía annarra fjölskyldumeðlima eiginlega óþarflega mikil held ég :)

Ætla að setja inn myndir bráðum

Fleiri skíðamyndir

2011-02-07T22:00:00.002Z

Skíðasnillingur!

2011-02-06T21:01:00.004Z

Dásamleg helgi að baki. Búin að prjóna eina lopavettlinga handa Eyfa (loksins), kenna ca 80 krílum fimleika OG fara á skíði! Og Úlfar Jökull, endemis snillingur er búin að fara sína fyrstu skíðaferð í Bláfjöll í dag, og í Breiðholtsbrekkuna í gær. Ég verð nú að segja að hann kom okkur Eyfa töluvert mikið á óvart, hann á neflilega slatta af skapi sem getur sveiflast í ýmsar áttir en til allrar hamingju sveiflaðist það í svakalega rétta átt varðandi skíði, fyrir utan 3 fyrstu mínúturnar í gær þegar hann sá ástæðu til að grenja dálítið yfir þessum óþægilegu skíðaskóm og svona. Eftir þær mínútur hefur hann brosað hringinn og staðið sig eins og sannt skíðakríli þangað til orkan hans var gjörsamlega búin í dag.

Það þarf varla að taka það fram hvað við Eyfi skíðasjúklingar erum glöð yfir þessu og sjáum alveg framtíðar skíðaferðir í hillingum! Hehe rómansinn er nú kannski ekki alveg skv. raunveruleikanum þar sem sjaldnast er snjór í Bláfjöllum og ef það er snjór þá er nú ekki alltaf gott veður og þó það sé gott veður þá getur þetta verið hellings puð :) En a.m.k. var rosa gaman í dag!

Ljúf helgi að baki

2011-01-31T08:28:00.002Z

Ohh hvað er stundum gott að eiga letihelgar. Herra orkubolti Úlfar Jökull fékk að gista í vesturbrún og fór þangað um miðjan dag á laugardag og við Eyfi skelltum okkur með Óla Kalmani á Kaffitár. Það er svo sem ekki í frásögur færandi nema fyrir það að hittum við aldeilis spes kumpána tvo. Þegar við komum inn voru tveir menn þar sem létu okkur eftir borðið sitt því við vorum með vagn og það borð var þægilega staðsett. Við þökkuðum fyrir okkur og síðan bara ekkert meir, þeir settust annars staðar. Svo sé ég út undan mér að þeir eru að fara, nema í staðinn fyrir að fara þá kemur annar þeirra til okkar og byrjar einhverjar þær furðulegustu samræður sem ég hef lengi lent í:

Maður: "Er þetta ekki fínt? Gott borð?"
Við (hálf hissa): "jújú þetta er bara fínt takk"
Maður: "Já einmitt, og hvað gerið þið?"
Við orðlaus
Maður heldur áfram "já þið virkið svo almennilegt fólk, brosið og svona"
Við (meira hissa): "humm tjahh jú við erum svona í raunvísindageiranum..."
Maður: "já fyndið að þið skulið nefna það. við félagi minn (nikkar í átt til hins mannsins) erum einmitt að vinna fyrir fyrirtæki, risastór fyrirtæki í 51 landi. Mætti ég kannski hitta ykkur yfir kaffibolla og ræða það?!"
Við (mjög hissa): "humm bíddu um hvað snýst þetta fyrirtæki?"
Maður: "Þetta er fyrirtæki um tækni í genarannsóknum"
"Við": tjahh ég er nú ekki viss um að það sé alveg okkar sérsvið..."

Og í stuttu máli sagt hætti hann ekki fyrr en hann fékk símanúmerið mitt og ætlar að hringja í mig til að fá að spjalla um þetta feykilega merkilega fyrirtæki um tækni í genarannsóknum, starfar í 51 ríki og í samstarfi við stanford og 20 bestu háskóla í heimi o.s.frv.

Við Eyfi erum nú þokkalega viss um að hér býr eitthvað misjafnt að baki. Hvaða hálfvitalega fyrirtæki vill ráða jarðfræðing í genarannsóknir bara vegna þess að hafa þakkað fyrir borð á Kaffitári!!! Þetta var alveg kostulegt, maður fær nígeríubréf oft í mánuði og bregður ekki við það, maður lendir í desperat fólki á djamminu eða á hlemmi, maður kannast við votta jehóva og öll þau "fínu" tilboð sem maður getur fengið á ferðalögum í útlöndum en þetta var alveg súrrealískt. Ég er ekki alveg viss hvað ég ætla að segja ef/þegar þessi furðulegi maður hringir (btw. hann sagðist hafa verið í björgunarsveit í 8 ár) en ég held að Hjörtur mágur sé algjörlega rétti maðurinn til að gera gott sprell úr þessu ;)

Anyway, um kvöldið fengum við Gústa og Oddnýju, þá snilldargesti í heimsókn í spjall og nokkur Jungle Speed og skemmtum okkur innilega vel.

Sunnudagurinn fór svo í meiri rólegheit. Ylfa fór með guttana báða í hesthús sem ku hafa verið mjög skemmtilegt (Ylfa taka myndavél með næst) og svo fórum við öll í sund og vöfflur hjá ömmu Petu.

Kv. Auður Agla

Gleðilegt ár og takk fyrir gömlu

2011-01-12T11:38:00.005Z

Bloggleysi stafar nú af almennri leti og almennri vellíðan og almennri þreytu! Ég er alltaf pínu sorgmædd í upphafi janúar og það grípur mig árlegt eirðarleysi og skrítin tilfinning en nú er hún farin aftur þegar allt er komið í sinn vanagang.

Það hefur kannski komið fram hérna áður að Úlfar Jökull á bangsa. Raunar á hann marga bangsa, óþarflega marga, en það er bara einn sem einhverju máli skiptir. Það er bangsi sem hann fékk í skírnargjöf og er búinn að vera með síðan stanslaust. Þetta stanslaust þýðir svo sem ekki allan daginn og alls staðar heldur aðallega bara tengt svefni en það er bara af því ég er svo skíthrædd um að bangsatetrið týnist einn daginn að ég reyni að takmarka ferðir bangsa eins og hægt er. Hann er samt sem áður búinn að fara með allar ferðir norður á Krossnes, alltaf í Svínadal, Vesturbrún, tjaldferðir, Innsbruck o.s.frv. Hann hefur farið með í ófáar svæfingar á spítalanum, verið með í vagninum og að sjálfsögðu hringlað í þvottavélinni marga snúninga!

Þess má nærri geta að bangsi (sem heitir ekki neitt) er að verða pínulítið sjúskaður. Ég veit ekki hvort það er sniðugt að segja það opinberlega en hann var einu sinni hvítur, augun eru enn á en þau sjást aldrei nema að ég "greiði" hárið frá þeim. Ástin á þessu bangsagreyi virðist síður en svo fara minnkandi og ég er pínu forvitin að vita hversu lengi hún endist.

En í fyrradag var prjónuð peysa á bangsa. Hún er skálduð á staðnum, bulluð í bak og fyrir og litir valdir af ótrúlegu handahófi. Ég pirraði mig á þessu stykki og bjóst við að peysan yrði frekar ljót og leiðinleg en eiginlega er hún bara mjög sæt og ég verð bara að játa að þegar það er búið að greiða frá augunum og klæða bangsa í peysuna þá er þetta bara dálítið krúttlegur bangsi!

Ein að aftan til að sjá mynstrið á peysunni ;)

Gleðileg jól

2010-12-24T08:52:00.002Z

Elsku lesendur þessarar bloggsíðu okkar!

Spennustigið á Sjafnargötu fer vaxandi og það er að renna upp fyrir eldri skriðjöklinum að jólin eru að nálgast og það er eitthvað spennandi! Hann er reyndar mikið búinn að tala um það á aðventunni hvenær jólin komi, og hvort þau fari líka í Vesturbrún og til Þórdísar vinkonu og eitt sinn hringdi dyrabjallan og þá hljóp hann fram og hrópaði að þetta væru jólin sem eru að koma. Ég vona að hann verði ekki fyrir miklum vonbrigðum þegar það kemur enginn "jól" heim til okkar a.m.k. ekki inn um útidyrnar...

Venju samkvæmt (og líka sökum aldurs) er öllu meiri ró í Óla Kalmani. Hann er bara hress og kátur eins og venjulega en er búinn að finna sér nýtt áhugamál; reyta skrautið af jólatrénu! Hann er líka mandarínusjúkur og borðar þær hiklaust með berkinum ef enginn er nálægur til að opna hana fyrir hann.

Myndin að neðan er tekin á jólaballi og sýnir glögglega hvað dregið hefur úr hræðslu ÚJE frá því síðasta ár. Óla Kalmani var nú ekkert um þessa gaura gefið og þessi mynd er tekin á því 3 sek augnabliki sem hann lét sig hafa það að sitja þarna :)

(Stundum er myndefnið valið umfram gæði myndarinnar)

Að lokum langar mig að segja gleðileg jól við ykkur öll sem kíkið hérna inn

og hafið það sem allra best yfir hátíðirnar!

Gaman gaman

2010-12-15T13:18:00.002Z

Það er greinilega svo gaman á aðventunni að það er enginn tími til að blogga! Við erum búin að gera svo margt skemmtilegt síðan síðasta blogg var skrifað og þar sem skammtímaminni mitt er töluvert takmarkað langar mig að punkta eitthvað hérna niður, mest fyrir sjálfa mig:

-Eyfi og Úlfar Jökull fóru í rúningsferð norður á Krossnes og við Óli Kalman vorum heima í svakalegum rólegheitum, svo miklum rólegheitum að jólagjöfum var pakkað inn (svo snemma held ég að ég hafi aldrei á ævinni pakkað inn jólagjöfum).
-Fórum niður á Austurvöll að kveikja á Oslóartrénu og sjá jólasveina syngja
-Fórum í jólaþorpið í Hafnarfirði, það er æði :)
-Búin að missa Eyfa úr landi, á hinn "enda" heimsins, nánar tiltekið til San Fransisco á ráðstefnu
-Búin að hitta Hildi, Halldóru og Röggu í yndislegu, árlegu jóla-love-actually-kvöldi í nýju æðislegu íbúðinni hennar Röggu
-Búin að hitta frábæru frænkur mínar í frænkuboði

og fleira og fleira og fleira. Úlfar Jökull er frekar duglegur að fara að sofa á kvöldin, vill alltaf fara yfir hvað næsti jólasveinn heitir og romsar upp úr sér hverjir séu nú þegar komnir og hann var alveg pikkfastur í því að sá sem kom í nótt héti "sleikiþvörur"

Óli Kalman er búinn að vera með fáránlega mikinn niðurgang (haha flott að blogga um svona) og ég er búin að skipta um svo margar hræðilegar bleyjur að ég held ég sé alveg búin með minn hluta í bili og Eyfi fær að taka við þegar hann kemur heim ;)

Framundan er bara meiri aðventa, ég elska aðventuna :)

Jeijei Aðventan er byrjuð!

2010-11-29T10:54:00.002Z

Ég held að aðventan sé skemmtilegasti tími ársins! Við fórum í gær að sjá tendrað á Oslóartrénu og héldum út alla skemmtunina, þangað til jólasveinarnir komu loksins síðastir því við höfðum séð það auglýst og vorum búin að tilkynna herra Úlfari það. Það voru líka engin vonbrigði og þeir báðir bræður ofsalega kátir að horfa á þrjá jólasveina dansa, fíflast og syngja.

Síðan fórum við á kaffihús og fengum okkur smá hressingu og röltum síðan aftur heim. Þetta var dásamlega kósí!

Síðan komum við heim. Ég hafði sett aðventuljós út í glugga um morguninn og hvíta jólaseríu í stofuna og svo ætlaði ég að kveikja loftljósið í stofunni svona af því við vorum komin heim, en neinei því mótmælti Úlfar Jökull harðlega -það átti sko að vera huggulegt! Svo vorum við þrjú í yngri deildinni að leika á meðan Eyfi eldaði kvöldmatinn. Úlfar þverneitaði alltaf að kveikja ljósin og fór inn í eldhús og tilkynnti pabba sínum:

"það er tósi!"
"ha??" segir Eyfi (sem er stundum oggu utan við sig og heyrir ekki alltaf hvað úje segir og það kemur fyrir að hann tekur ekki alveg eftir að úje sé að reyna að segja eitthvað. Eyfi var samt alveg að hlusta í þessu tilfelli),
"þad er TÓSI" endurtekur Úlfar Jökull hátt (og átti við að þar væri kósí í stofunni hjá okkur)
"hvað ertu að segja Úlfar minn?"´
Þá svarar Úlfar dásamlega ákveðinn: "Pabbi, hlustaðu á mig!!! Það er tósí"

Eflaust finnst fáum þessi saga jafnskondin og mér, en "pabbi, hlustaðu á mig" var bara svo skemmtileg setning frá ákveðnum ungum manni.

Mig langar til útlanda...

2010-11-16T09:40:00.002Z

-mig langar til Innsbruck á jólamarkaðinn og drekka glühwein og borða kiarchl og auðvitað fara á skíði

-mig langar með strákana í dýragarð

-mig langar í borgarferð með Eyfa, eitthvert sem ég hef ekki komið, t.d. í Skotlandi

-mig langar að búa í útlöndum í smá tíma þó svo að við höfum það svaka gott á Íslandi og læra ýmislegt nýtt

-mig langar til Hawaii og Svíþjóðar og Alaska ogNoregs

Vá hvað er gott að hafa huga til að láta sig dreyma í! :)

Smá saga

2010-11-09T08:56:00.002Z

Mér sýnist á kommentakerfinu að ég þurfi að setja inn myndir af einhverju meira djúsí en páfagaukabol en Úlfar Jökull er ótrúlega glaður með hann. Ég fann mér mynd á netinu og prentaði út, dró upp á þar til gerðan pappír og skar páfagaukinn allan út svo úr varð páfagaukastensill. Svo straujaði ég hann á bolinn og málaði. Svo beið ég þangað til málningin var þornuð og þá dró ég pappírinn af og tatamm -bolurinn tilbúinn!

(Ég veit ekki alveg hvort eftirfarandi saga skilar sér á prenti en a.m.k. fannst mér þetta mjög fyndið): Á síðasta föstudagsmorgni, um kl.7:30, vorum við Úlfar Jökull inni í stofu, ég sat í sófanum og hann stóð við stofuborðið að púsla. Hann hvolfdi púslinu til að byrja upp á nýtt og það datt eitt púslið á gólfið.

Ég: "Úlfar minn, það datt eitt púsl á gólfið."
Úlfar Jökull lætur sem hann heyri ekki í mér og lítur hvorki á mig né á púslið á gólfinu
Ég (örlítið hærra og ákveðnar): "Úlfar Jökull, það datt púsl á gólfið!"
Úlfar Jökull haggast ekki, lítur ekki upp en heldur áfram að púsla mjög upptekinn en segir svo mæðulega:
"Mamma, ég næ bara í það þegar ég er búinn að púsla!"

Mér líður stundum eins og ég fylgi honum ekki alveg eftir í þroskanum, honum fannst ég augljóslega frekar kjánaleg að halda að hann vissi ekki af þessi púsli á gólfinu. Og eins með Óla litla Kalman sem ég held alltaf að sé svo lítill, í gær t.d. sat hann allt í einu uppi á triptrap stólnum hans Úlfars eins og ekkert væri sjálfsagðara, hann bara dundaði sér við að klifra upp í hann hlýtur að vera. Hann lætur frekar lítið yfir sér en leynir á sér, t.d. benti hann á ísskápinn um daginn og sagði "ódúrt" (=jógúrt) og þá sagði Eyfi mér að hann hefði áður sagt jógúrt og er farinn að nota það orð!

Nýjasta heimilisafurðin...

2010-11-06T17:49:00.000Z

Óli Kalman

2010-11-05T21:23:00.003Z

Yfirdrifin handavinnuþörf

2010-10-29T14:06:00.002+01:00

Stundum er ég alveg að kafna úr prjónahugmyndum, ég hef lengi verið með bók í töskunni sem ég skrifa í allt sem mig langar að prjóna og núna eru a.m.k. 20 atriði á listanum. Það er svo sem í lagi en þegar ég er líka komin með langan saumalista og "heimilisbetrunarlista" (s.s. mála, hengja upp myndir, bólstra stóla, lakka kommóður o.s.frv.) þá verður þetta eiginlega yfirdrifið og næstum yfirþyrmandi, sérstaklega þar sem það eru ekkert mjög margar klst. í sólarhringnum (ég á sem betur fer þjáningarsystur í þessu). Mér hefur verið ráðlagt að hætta bara að vinna og einbeita mér að þessu en það er ekki svo einfalt. Í fyrsta lagi finnst mér skemmtilegast að gera eitthvað fyrir sjálfa mig eða fólk og börn í kringum mig, í öðru lagi þarf ég á laununum mínum að halda, í þriðja lagi er ég ömurleg bissnesskona og get ekki hugsað mér að fara út í að selja eitthvað og í fjórða lagi er vinnan mín fín og gaman að hugsa um jarðfræði. Sjálfskaparvíti :)

Ég er búin að prjóna eina nýja lopapeysu á Úlfar Jökul og eina voða sæta peysu á Óla Kalman sem ég þarf að taka myndir af fljótlega. Svo er það bara enn ein helgin, það er að koma nóvember með dimmu, ég kveikti á kerti í gær í fyrsta sinn í langan tíma, það var mjög huggulegt á sjafnó þrátt fyrir "smá" ys og þys sem tilheyrir guttunum tveimur:)

Kvennafrí

2010-10-25T21:54:00.002+01:00

Ég er ofsalega stolt af íslenskum konum í suddaveðrinu í dag, enn stoltari af konunum sem gerðu þetta fyrir 35 árum og fannst æði að horfa á Vigdísarmyndina á rúv í gær. Ég verð víst að viðurkenna að ég mætti ekki á Skólavörðuholtið í dag, ég lofaði Úlfari Jökli smá prógrammi. Þannig er nebblega að á laugardaginn fór hann í Svínadal með Ásu ömmu og afa Óla og ég pakkaði náttúrulega sæng og fötum og öllu tilheyrandi, þar á meðal duddu. Hins vegar vildi svo til að Ása amma fann enga snuddu neins staðar svo Úlfar Jökull varð að sofa duddulaus þrátt fyrir uppástungur hans um að fara á Sjafnargötu að sækja hana...

Við Eyfi hertum upp hugann í gærkvöldi og ákváðum að halda snudduleysinu til streitu. Ég bjóst við að þetta myndi kosta frekjukast af hans hálfu og jafnvel pirring af minni hálfu. Hins vegar fór þetta svo að hann var afskaplega sár og leiður og grét smá en var svo bara ótrúlega dapur svo ég varð ekkert pirruð heldur líka ofsalega döpur að hafa tekið svona ástkæran hlut af honum -svona er ég lítil sál!

En a.m.k. í dag þá fórum við Úlfar Jökull í húsdýragarðinn með eina duddu og gáfum litla kálfinum sem fæddist fyrir tveimur vikum. Kálfgreyið ætlar svo að fá dudduna á kvöldin og nota hana á nóttunni. Eftir garðferðina fórum við svo í búð og hann fékk að velja sér púsluspil í verðlaun. Þetta gekk framar vonum og hann tilkynnti ömmu og afa að hann væri stór strákur og hættur að nota duddu!

Gallabuxurnar hans pabba

2010-10-23T17:46:00.003+01:00

Ég sagði einhvern tímann hér eða á fésbók að ég væri að sauma smekkbuxur úr gömlum gallabuxum og lofaði að setja inn mynd. Seint kemur sumt en kemur þó og hér kemur loksins mynd. Þetta voru sem sagt gamlar gallabuxur af Eyfa sem voru margbættar og enn einu sinni götóttar og úrskurðaðar ónýtar. Ég klippti og saumaði og bullaði og skemmti mér og úr urðu þessar buxur. Það eina sem ég keypti í þetta var eitt tvinnakefli...

Dálítið krútt

2010-10-22T14:25:00.001+01:00

Litli eins árs!!!

2010-10-21T09:58:00.003+01:00

Elsku litli Óli Kalman varð 1 árs á dögunum! Það var haldin afmælisveisla með minimal aðstoð ammanna sem er mikil framför húsmóðurinnar á nr.7 :) Ég bakaði rosalega lestarköku sem ég held að sé ráðlegt að birta mynd af hér við tækifæri. Óli Kalman fékk fullt af góðum gjöfum frá fullt af góðu fólki og við þökkum innilega fyrir okkur.

Það á að heita svo að hann sé farinn að ganga, a.m.k. smá þegar honum dettur í hug og er í stuði. Honum finnst þetta samt enn svolítið hættulegt og best að skríða bara þegar hann leggur í langferð. Hann er ekki sérlega ræðinn ungur maður, er búinn að segja "datt" síðan hann var 10 mánaða og nota á réttum tímum og svo segir hann "mamma" og með góðum vilja má álykta að hann segi líka "úff" = voffi, "me" = kind og "mu" =kýr. Svo hefur hann nokkrum sinnum sagt skýrt og greinilega "meija" = meira en mér finnst það einhvern veginn samt hafa verið tilviljun.

Úlfar Jökull er dálítið á gullkornaskeiðinu. Um daginn vorum við í bílnum að keyra heim um kvöld og hann er að velta fyrir sér veðrinu og segir að það sé enginn snjór. Og svo spyr ég hann eitthvað um veðrið á morgun og þá segir hann "það kemur bara í ljós!"

Hann á sér þá ósk heitasta flesta daga að fara í sveitina til Systu og Úlla eða að fara í Svínadal og stingur oft upp á því. Hann er líka ótrúlegur aðstoðarbílstjóri, biður mann að beygja hér eða þar, fara "hérna niðureftir", lætur mann vita þegar maður keyrir hratt o.s.frv.

Myndir væntanlegar!

2010-09-17T10:15:00.000+01:00

16.júní - 15.september

2010-09-15T13:47:00.002+01:00

Obbossía, 3 blogglausir mánuðir liðnir. Ég ætti eiginlega að bíða til morgundagsins með þessa bloggfærslu, það væri meira kúl að hafa 16. - 16. en skítt með það.

Ég veit ekki alveg hvar ég á að byrja en þetta sumar var æði! Af síðustu 60 nóttum höfum við sofið 18 á sjafnó!

17.júlí var ættarmót í sumarbústaðnum í Svínadal. Daginn eftir komu Linda, Andri og Ágústa Rut til okkar og það voru hressir dagar í geggjuðu veðri. 2007, 8 og 9 sáu algjörlega um að halda okkur við efnið svo það var ekkert ægilega rólegt en mjög gaman.

Frá Svínadal fórum við norður á Krossnes. Við vorum þar í rúmar 2 vikur, fram yfir verslunarmannahelgi, Eyfi sló tún og ég sá um stráka, við gengum líka á Kálfatind, fórum á ball og auðvitað daglega í sund!

Eftir að frábærri Krossnesdvöl lauk fórum við í tjaldferð, gistum í Heydal í Mjóafirði í þrjár nætur. Það var algjört æði, veðrið frábært, fórum inn í Kaldalón og Snæfjallaströnd (aldrei farið áður), tíndum rauðhettu og aðalbláber og átum, fórum í sund og heita potta og sungum Emil í bílnum! Það eina sem tók á í sambandi við að vera með sjafnargötuguttana í tjaldi voru blessaðar kvöldmáltíðirnar sem tóku verulega á sökum verulegs aktívitets þeirra og hjálpsemi við að grilla, skera salat, leggja á "borð" (tjaldbotninn) o.s.frv.

Frá Heydal fluttum við okkur norðar og vorum í bústað í Engidal rétt við Ísafjörð. Þangað fengum við ótrúlega góða gesti, Gústi og trillurnar þrjár :) Og mamma hans Eyfa slóst líka í hópinn. Og ég ætla að vera sammála svo mörgum öðrum og dásama Vestfirði, þetta var algjört æði og veðrið og allt! Síðan var skipt um félagsskap, Gústi, Oddný, Þórdís og Sigríður Ása rúntuðu suður aftur og Peta og mamma og pabbi komu í staðinn. Þá voru náttúrulega tíndir sveppir í Tungudal. Við vorum með dálítinn heimferðarkvíða (eftir 30 daga fjarveru) og engan langaði heim svo við tjölduðum eina nótt í Vatnsfirði á Barðaströnd og svo líka eina nótt í Svínadal!

Síðan vorum við heima í 9 daga held ég, dagarnir fóru aðallega í sveppi og fataþvott og pökkun upp og ofan í töskur. Að kvöldi 23.ágúst fórum við nebblega til INNSBRUCK!!! Mér finnst eiginlega núna að þetta hafi verið draumur þegar ég skoða myndirnar þaðan en þetta var æði. Ég hef ekki komið þangað síðan 2007 þegar við fluttum heim og mér fannst það svo svakalega gaman og ég var búin að gleyma hvað fjöllin þarna eru há og falleg og bærinn sætur og bjórinn góður og sólin hlý o.s.frv.!

Við vorum úti í 9 daga og komum svo heim aftur, aftur að sveppast, pakka upp, niður og þvo og svo flugu Eyfi og Úlfar Jökull norður á strandir aftur í smalamennsku á mánudag fyrir viku. Ég var hér til fimmtudags og keyrði svo norður með Óla Kalmani. Við vorum svo að koma heim seint á mánudagskvöld og þið getið rétt ímyndað ykkur að nú er svona pakka upp, niður og þvo tímabil :) Það er ekki bara öll óhreinu smala og fjárhúsafötin heldur líka leifar frá Innsbruck og sumrinu sem hreinlega náðist ekki að þvo, hahahaha!

Ég held þetta sé ekki mjög skemmtilegt blogg en það er haugur af myndum sem bíður eftir að komast hingað og svo líka fullt af skemmtilegri sögum, pælingum og fréttum.

Sumarið er komið

2010-06-16T23:13:00.005+01:00

Fæst orð bera minnsta ábyrgð og nokkrar myndir tala sínu máli hér, allar í belg og biðu!

Nýjasta myndin: Óli Kalman skríður út um allt og stendur upp og grallarast brosandi með englasvip

Frændurnir Hjalti og Óli Kalman, frekar hreyfanlegir báðir tveir og eftir því erfiðir í fyrirsætustörfunum...

Eyfi sýnir áður óþekkta tónlistarhæfileika og spilar á glös (kannski vínið sem innbyrt var áður hafi bara haft jákvæð áhrif ;)

Elsku litli og góði bíllinn okkar er SELDUR

Þrír afburða hjólaviðgerðarmenn í Skíðadal

Urður heimasæta í Skíðadal í essinu sínu, Snjóþotan ekki langt undan enda stutt síðan veturinn hörfaði úr dalnum

Oliver kennir Úlfari Jökli nokkra trommutakta

Óli Kalman í Skíðadal

Feðgar á dráttarvél á Krossnesi

"klappa saman lófunum!"

Ofsalega kátur strákur í sveitinni

ÚJE í sveitaklippingu hjá ömmu Petu :)

"tveggj'ara"

2010-05-12T11:16:00.003+01:00

Duplo kubbakassi í afmælisgjöf frá mömmu og pabba, opnaður árla morguns!

Kubba - kubba - kubba

Tveir þreyttir í lok dags...

Ég á stóran, tveggja ára strák sem er skemmtilegur og fjörugur, dramatískur og mjög ákveðinn og um fram allt hörkuduglegur og frábær gutti. Hann átti afmæli í geggjuðu veðri á sunnudaginn og vinir og ættingjar kíktu í heimsókn í smá afmælisveislu. Hann fékk líka fullt af frábærum gjöfum, takk innilega fyrir okkur.

Smá mistök

2010-05-01T22:53:00.003+01:00

Eitthvað virðist ég hafa verið upptekin af sonum mínum í síðustu viku því ég gleymdi því miður að óska mínum ástkæra ektamanni til hamingju með afmælið. Eyfi varð sem sagt eldgamall þann 23.apríl. Sem betur fer gleymdi ég ekki deginum sjálfum, hann var vakinn með fullt af pökkum í rúmið en þurfti reyndar að vinna megnið af deginum. Um kvöldið var síðan ljómandi fínn matur í Vesturbrún og Eyfafjallajökulskaka í eftirmat (sjá mynd).

Allir einstæðir feður og mæður hafa fengið margar hlýjar hugsanir frá mér undanfarna daga. Það verður að viðurkennast að það er töluvert álag að vera einstæð með ÚJE og ÓKE en ömmurnar og Óli afi bjarga öllu. Þrátt fyrir það hefur lítið verið ryksugað undanfarið og draslið fær að mestu leyti að vera óáreitt þar sem það var áður... En litlu guttarnir eru samt óttalega sniðugir og skemmtilegir. Úlfar Jökull fékk að gista á Vesturbrún síðastliðna nótt. Í morgun borðaði hann morgunmat og svo fóru hann og amma eitthvað að leika nema hvað hann mæltist til þess upp úr eins manns hljóði að nú yrði farið í "húsdýdarrinn". Þetta stóðst auðvitað ekki eldra liðið á svæðinu og hann fékk að fara í húsdýragarðinn með ömmu og afa -ALSÆLL! Hann lærði nýtt orð í dag, "búmmistan" (fyrir þá sem ekki átta sig á þessu þá á þetta víst að þýða sumarbústað). Við skruppum í dag upp í Sólheimakot og þess má nærri geta að þetta var honum að skapi. Úti að vesenast og inni í litlu húsi að borða nesti, fullkomin blanda að mati herra Jökuls. Í allt kvöld sagði hann líka öðru hvoru "aftur búmmistan", við þurfum greinilega að renna þangað upp eftir fljótt aftur.

Úlfar Jökull að borða nesti í búmmistan

Okkar kæru vinir Gústi og Oddný eignuðust litla stelpu í nótt svo nú er Þórdís Nanna, stórvinkona ÚJE orðin stóra systir. Við óskum þeim innilega til hamingju og hlökkum rosa til að fá að hitta nýjuna. Fyrir þremur árum fórum við öll í sjúklega skemmtilega Balkanferð, þá fjögur talsins en í sumarbústaðaferð sumarsins verðum við ÁTTA!!! Þvílík fjölgun.

Afmæli, kindur, eldgos, ferðalag o.fl.

2010-04-25T23:15:00.003+01:00

Fórum þrjú með ömmu Petu í dag upp á Akranes til frænku sem er með smá fjárbúskap þar og hittum lömb og kindur og hesta og dráttavélar og krakka :) Sjá myndir:

Óli Kalman var ótrúlega hamingjusamur með rollurnar!

Og Úlfar Jökull athafnaðist heil ósköp í margar klukkustundir

Sæl og blessuð öll :)

Ég hef fína gosafsökun fyrir lélegri bloggframmistöðu. Eyfi hefur verið mjög iðinn í vinnu við Eyjafjallajökul síðan það gos hófst með tilheyrandi hliðaráhrifum og er nú í þessum skrifuðu orðum á leið til Frakklands og síðan Austurríkis á ráðstefnur og það hefur líka krafist undirbúnings. En hér er nú samt komið blogg.

Óli Kalman er orðinn 7 mánaða, búinn að standa upp nokkrum sinnum í rimlarúminu sínu, fá eitt stykki tönn og farinn að borða alls kyns grautagums. Hann er yfirleitt rólegur og ótrúlega meðfærilegur en sýnir skap sitt af og til og fæst ekki með nokkru móti til að sofa lengur en til kl.6 á morgnanna. Þeir eru raunar farnir að sofa saman í herbergi guttarnir -það er æði að horfa á þá sofandi saman og þeim finnst ofsalega gaman að fíflast og hlæja saman á kvöldin þegar þeir eiga að vera farnir að sofa.

Úlfar Jökull er alveg óborganlegur stundum og það koma oft augnablik þar sem við Eyfi erum bæði í kringum hann og ráðum engan veginn með tærnar þar sem hann hefur hælana í afköstum. Dæmi: hann sullar viljandi úr glasinu sínu, ég næ í tusku til að þurrka. Á meðan hendir ÚJE rúsínum á gólfið, Eyfi beygir sig til að taka þær upp, ÚJE prílar niður úr stólnum sínum, opnar ísskápinn, nær í öskju af tómötum og opnar hana svo 14 tómatar skoppa út um allt eldhúsgólf (ég ennþá með tuskuna í höndinni og Eyfi að tína rúsínurnar upp...). Á svona stundum get ég yfirleitt ekki annað en hlegið! En þegar maður virkjar athafnasemina þá gengur þetta vel, t.d. með því að púsla alls kyns flókin púsluspil, sópa, ryksuga, lesa bækur með okkur og eitthvað svona.

Jæja en nú er best ég leggi hausinn á koddann til ég vakni ekki of lúin kl.6 :D

Af tækjum og dýrum

2010-04-07T08:20:00.002+01:00

Úlfar Jökull er að bisa við að læra að tala og gengur svona ágætlega. Hann bjargar sér með flest sem hann þarf að koma til skila og grípur stundum til táknanna sem hann kann líka þegar þess gerist þörf. Hann virðist samt vera að koma sér upp extra þekkingu á ákveðnum sviðum. Annar flokkurinn eru farartæki og ýmis tæki. Hann þekkir og segir t.d. strætó, vörubíll, rúta, bíll, jeppi, dráttarvél, öskubíll, grafa og krani og gerir skýran greinarmun á öllu saman. Bíll og jeppi er t.d. engan veginn sami hluturinn og hann klikkar ekki á því.

Hinn flokkurinn snýst um dýr. Voffi, kisa, hestur, svín, kusa, kanína, brabra, bíbí, api, gaggala hefur alveg fest sig í sessi frá því í haust en nú hefur bæst heldur í safnið; hvolpur, mús, lamb, naut, krummi, svanur, gæs, kría, lundi, rebbi, selur og líklega gleymi ég einhverju. Sumt af þessu kemur úr Vegahandbókinni sem hefur verið algjörlega uppáhaldsbókin undanfarið. Vinsældir hennar virðast samt vera að dragast saman, líklega á kostnað geysivinsælla bóka sem ÚJE les í vesturbrún með ömmu Ásu og eru svona "alfræðibækur" um spendýr eða eitthvað svoleiðis.
Nú þekkir hann og segir fíll, gíraffi, úlfaldi (það er eitt af uppáhaldsdýrunum), panda, sebrahestur, hvalur, nashyrningur, ljón, tígrisdýr o.s.frv.

Doktor Eyfi

2010-04-01T22:34:00.001+01:00

Það vita margir að Eyfi á það til að vera örlítið utan við sig. Ég er ekki frá því að það hafi aðeins ágerst í kjölfar þessa eldgos. A.m.k. varð skondið atvik í gær þegar ég var að fara að gefa Óla Kalmani að borða graut. Ég sat með litla í fanginu og bað Eyfa að ná í smekk sem hann og gerði. Síðan kom Eyfi með smekkinn og annars hugar batt hann smekkinn Á MIG!!! Ég hélt hann væri að fíflast og fór eitthvað að segja og þá hrökk hann í kút þegar hann áttaði sig á mistökum sínum og við sprungum úr hlátri :)

Eldgos

2010-04-01T21:59:00.003+01:00

Hafi það farið fram hjá einhverjum þá kemur það fram hér að eldgos er hafið og í gangi á Fimmvörðuhálsi ;) Hafi eitthvað annað verið í fréttum undanfarna 12 daga þá hefur það líklega farið fram hjá okkur á Sjafnó. Hér hefur neflilega ekki verið hugsað um mikið annað en eldgos síðan það hófst.

Það byrjaði allt með því að við fórum á nokkurs konar árshátið félags Árneshreppsbúa (svokallað Búaball) sem byrjaði með mat og herlegheitum. Ég fór síðan heim um miðnætti og leysti pössunarpíurnar af :) Strákarnir náttúrulega steinsofandi og ég fór bara líka að sofa og vakna svo frekar stuttu seinna við Eyfa sem stendur í forstofunni og segir "Varstu ekki búin að frétta það???" Ég vissi náttúrulega ekkert hvað hann var að tala um og hann (oggu létthífaður af víni kvöldsins) alveg hneykslaður yfir að ég skyldi ekki vera búin að frétta af gosinu, ein sofandi heima! Hann hoppaði úr sparifötunum og í önnur föt og var þar með þotinn um miðja nótt niður í háskóla og síðan hef ég varla náð sambandi við hann...

Sunnudaginn sem gosið hófst var Úlfari á augabragði kennt að segja "eldgos" og þekkja. Fyrst fannst honum þetta æði en nú er þetta bara svona daglegt brauð, eldgos í tölvunni og eldgos í fréttunum. Reyndar sá hann svo pabba sinn líka í fréttunum en fannst það bara eðlilegt.

Eyfi er búinn að fljúga yfir gosið oft og mörgum sinnum með Landhelgisgæslunni og svo brugðum við okkur austur fyrir fjall eins og allir hinir síðustu helgi. Við vorum í sumarbústað SKB við Flúðir og á laugardeginum fór Eyfi með vísindaliði inn í Þórsmörk og upp að gosinu. Við þrjú ásamt Ásu ömmu og Óla afa sem bættust í hópinn um morguninn hossuðumst inn í Fljótshlíð næstum eins langt og hægt var að komast og sáum strókinn af og til. Síðan fórum við öll til baka í bústaðinn og Eyfi kom til baka seint um kvöldið. Hann var svo kátur með daginn að hann bara brosti hringinn! Á sunnudeginum gerðumst við mamma og pabbi töluvert 2007 í hugsun og fórum í þyrluflug upp að gosinu og um svæðið. Í stuttu máli sagt var það ÓTRÚLEGA GAMAN, eitthvað sem ég mun muna eftir alla ævi og mamma og pabbi örugglega líka :)

Frændur

2010-03-17T18:30:00.002Z

Ein mynd af þeim frændum, Óla Kalmani og Hjalta. Hjalti hefur heila 6 daga í forskot á Óla en þrátt fyrir "aldursmuninn" þeir ná hörkuvel saman ;)

Myndasyrpa

2010-03-03T21:12:00.002Z

Stóri spekingurinn

og Litli snúðurinn

Þórdís Nanna og Úlfar Jökull

Og tvær sundmyndir

Sjafnargötuguttarnir!

2010-02-25T09:09:00.000Z

Loksins oggu vetur

2010-02-25T08:45:00.002Z

Nú sit ég hér í stofunni heima með tölvuna í kjöltunni og horfi og hlusta á vindinn og snjóinn og fokið og skafrenninginn og allt þetta fyrir utan gluggann -lúxus að fá loksins pínu vetur. Hver veit nema það verði möguleiki að fara aðeins á skíði fljótlega?

Á eftir er ég að fara í jaxlatöku, það er nú ekki það skemmtilegasta sem hægt er að gera á svona fínum fimmtudegi en ég geri mér vonir um að þetta verði ekki mikið mál.

Óli Kalman er algjör krúttukall. Hann hefur mun meira jafnaðargeð en við höfum kynnst hjá Úlfari og það er næstum alltaf stutt í brosið hans. Nú er hann í ungbarnasundi, fór í fyrsta sinn í kaf í gær og var fáránlega sáttur við allt. Fór a.m.k. 15 sinnum í kaf, grét aldrei og hóstaði ekki einu sinni heldur bara brosti út í loftið. Svo er hann líka ótrúlega duglegur að vera á maganum, veltir sér af bakinu á magann og mjakar sér svo aftur á bak og er hreinlega farinn að hreyfast úr stað, 5 mánaða.

Á sunnudaginn fórum við í skemmtilega heimsókn til frábærs fólks á Hvolsvelli sem við kynntumst í gegnum krabbameinið. Það er ekki amalegt að geta skroppið aðeins út úr bænum og þiggja vöfflur og kryddbrauð og láta kasólétta húsmóðurina stjana við sig (ó mæ). Úlfari fannst þetta heldur ekki leiðinlegt og var hugfanginn af Bjarti og Gunnari og öllu flotta dótinu þeirra.

Tungumálið hjá Úlfari Jökli er allt að skána, hann er mikið farinn að segja tvö orð saman og stundum þrjú og það er löngu orðið ómögulegt að hafa tölu á fjölda orða þar sem hann apar upp eftir okkur og svo er hann alltaf að koma mér á óvart og segja orð sem ég hef ekki hugmynd um að hann kunni því við höfum einfaldlega ekki notað. Hann er orðinn dálítill bílakall, keyrir um með bílana sína hérna inni og gerir skýran greinarmun á "burrum" og jeppum sem hann sér úti. Dýr eru ennþá mjög vinsæl, t.d. úlfaldi, hestar, svín, hundar og kisur. Hann er samt því miður allt í einu farinn að verða mjög hræddur þegar hann hittir þau í návígi, þorir t.d. ekki lengur að klappa hundum :S Það verður að reyna að bæta úr þessu á Krossnesi í sumar.

Guttarnir eru á sama stað í bólusetningaferlinu, þ.e.a.s. ÚJE er að fá sömu sprautur og Óli Kalman, báðir voru í 5 mánaða sprautu í síðustu viku. Úlfar var fyrstur, fylgdist vandlega með hjúkkunni hafa til nálina og bóluefnið, fékk svo stunguna í lærið og viti menn, barnið kipptist ekki einu sinni við, gretti sig ekki, grenjaði ekki og einfaldlega sýndi engin merki um að neitt óþægilegt hefði átt sér stað. Ég veit hann er nagli, en það er samt svo ótrúlegt að sjá tæplega tveggja ára barn í þessari stöðu enda missti hjúkkan andlitið bara ofan í gólf sýndist mér. Svo var Óli greyið sprautaður og fór að hágráta og ÚJE var steinhissa á því og talaði mikið um þetta. Óli Kalman var svo vigtaður og mældur og þykir víst dálítið léttur miðað við lengd og alveg búinn að tapa sinni kúrfu en er vær og góður og þriflegur að sjá svo engin ástæða til að hafa neinar áhyggjur af því.

Aftur MRI

2010-02-05T20:59:00.003Z

Úlfar Jökull og Eyjólfur frændi í bíló

Litli kúturinn

Og í Vesturbrúnarbaði með Ágústu Rut

Það er kominn tími á nýtt blogg. Fyrir 10 dögum síðan fórum við með Úlfar Jökul í okkar reglubundna eftirlitssegulómmyndatöku. Í stuttu máli sagt kom hún út eins og sú á undan sem var í september og það túlkum við sem mjög góðar niðurstöður. Þar að auki er hann náttúrulega alveg ótrúlega sprækur og óveiklulegur svo við erum í skýjunum með hann. Við fylgjumst alltaf vel með okkar "krabbameinsvinum", fyrst og fremst hinum litlu guttunum sem greindust á svipuðum tíma og ÚJE og þeim gengur líka ofsalega vel og eru algjörir naglar. Því miður erum við líka alltaf að heyra af nýjum krökkum að greinast með krabbamein og það finnst mér mjög leiðinlegt.

Nú í vikunni sótti ég Úlfar Jökul á leikskólann sem er svo sem ekki í frásögur færandi nema hvað leikskólakennararnir tjáðu mér að þeim þætti Úlfar nokkuð vel gefinn og úrræðagóður. Þá hafði guttinn verið að borða kjötsúpu og beðið um meira þegar hann átti enn eitthvað grænmeti eða hrísgrjónasull eftir á disknum sínum. Fóstran svaraði honum því að hann væri enn með mat á disknum, hann yrði að tæma hann eða eitthvað á þá leið. Úlfar Jökull var ekki lengi að finna út úr því, hann einfaldlega hellti af disknum sínum á gólfið, rétti svo diskinn fram aftur og bað um meira, alveg saklaus á svipinn. Þegar ég svo leit inn á leikskólann þá sat hann á stólnum sínum með myndarlegan kjötsúpupoll undir stólnum sínum!

Þetta er náttúrulega algjör kútur :)

2010-01-18T12:15:00.002Z

Fleiri myndir

2010-01-15T15:27:00.003Z

Þetta blogg er að verða að allsherjar myndabloggi. Vesturbrúnarstórfjölskyldan fór í Svínadalinn á nýársdag í dýrðlegu veðri og hafði það ofsalega gott en einn ónefndur kemur í veg fyrir að svona sumarbústaðaferðir sem og jólin fari í algjöra leti, manni er alveg haldið við efnið skulum við segja. Eins og sumarbústaðalög gera ráð fyrir var farið í pottinn, góður matur borðaður, spilað og sofið (misvel samt ;)) Við spiluðum kollgátuna og fórum líka í mjög skemmtilega útgáfu af hver er maðurinn a la Ylfa og Hjörtur. Að ógleymdri hlaupaæfingunni sem fram fór. Þetta var reyndar hlaupaKVENNAæfing þar sem allt karlkyns liðið, sem meira að segja er komið í meiri hluta, var of latt til að nenna að hreyfa sig -og jújú vissulega þurfti að passa suma þeirra :) Hlaupaátak Auðar Öglu er sem sagt hafið, frá og með 2.janúar og framundan eru stór plön...

Ein tannburstamynd. Í speglinum má sjá Ylfu Rún, Eyfa og Ásu ömmu fersk og falleg :)

Svartir Asics skór eru greinilega eitthvað inn hjá vesturbrúnarliðinu, er þetta ekki örugglega í tísku. Það meira að segja vantaði a.m.k. eitt par.

Úlfar Jökull hefur enn kústaáhuga

"já takk, ég þarf eiginlega báða sko"

Smá myndir frá síðasta ári

2010-01-06T19:03:00.000Z

Úlfar Jökull virðist yfirleitt búa yfir töluverðri orku og athafnasemi sem stundum getur valdið foreldrunum smá þreytu en oft er alveg kostulegt að fylgjast með honum. Á fyrstu myndinni er hann með samansafn hluta; pottur, skúringafata, dót, stígvél og fleira sem honum fannst upplagt að setja í barnabílstólinn hans Óla Kalmans og vesenast með til og frá.

Hér eru allir, hver einn og einasti pottur og panna sem við eigum, komnir inn á stofuborð og þeim vandlega raðað til og frá...

Gestum sýnir Úlfar Jökull yfirleitt ekkert nema sína mestu rólyndishlið og heldur sig oftast á mottunni svo fólk heldur iðulega að þetta sé rólegt og fyrirferðarlítið barn. Hér eru hann og Þórdís Nanna vinkona að lesa bækur í mestu makindum.

Líka gott að láta lesa fyrir sig...

2010-01-02T20:52:00.001Z

Nú árið er liðið og svona

2010-01-02T20:47:00.002Z

Það er ekki úr vegi að fara að blogga smá þar sem ég hef ekkert skrifað hér inn síðan á síðasta ári! Ótrúlegt að árið 2009 sé liðið, eins og mér finnst nú samt langt síðan jólin 2008 voru og ótrúlega margt hefur gerst á þessu ári.

Um jólin í fyrra áttum við lítinn 7 mánaða gutta í miðri krabbameinsmeðferð, fórum á spítalann tvisvar á dag öll jólin, nokkrar svæfingar og fleira vesen án þess að okkur fyndist það neitt tiltökumál þá–svona var það bara. Þau jól höfðum við ekki hugmynd um að, að ári yrðu guttarnir orðnir tveir og krabbameinið að öllum líkindum úr sögunni!

Við höfum haft það mjög skemmtilegt og gott þessi jólin en ekki þau rólegustu eins og kannski við er að búast með Óla Kalman og Úlfar Jökul sem hressa ótrúlega upp á tilveruna! En hefðbundin atriði eins og jólaboð, ofát, óhóflegt sykurmagn og púsl hafa vissulega verið til staðar. Þá fengum við ofsalega mikið af góðum gjöfum og þökkum kærlega fyrir okkur.

Mig langar að tiltaka nokkur atriði frá árinu (ekki í tímaröð):

-krabbameinsmeðferðarlok án aðgerðar :D:D:D

-mín ástkæra vinkona til áratuga, Linda giftist Andra –frábær dagur í alla staði

-sveppabókin hennar mömmu kom út -snilldarverk þar á ferð sem allir þyrftu að eignast...

-Úlfar Jökull varð 1 árs og stækkaði örugglega um helming, gáfnaðist líka töluvert og vill nú helst stjórna því algjörlega hvenær hann fær kex og berst mjög kröftuglega gegn öllu því sem honum finnst argasta óréttlæti af hálfu foreldra sinna

-okkar kæru Gústi og Oddný giftu sig með pompi og prakt, stórglæsileg að sjálfsögðu

-Óli Kalman fæddist 22.september eftir 41,5 vikna meðgöngu, afskaplega ljúfur og sætur og æðislegur pjakkur.

-Gletta litla kvaddi (mér þykir leitt að sumir munu frétta það hér en það kemur sér færsla um þetta mál)

-Við fórum í útilegur á Snæfellsnesið og Húnavatnssýslurnar, skruppum í Svínadalinn nokkrum sinnum og fórum margar ferðir norður á Krossnes, m.a. í sauðburð og heyskap. Vegna eindæma dugnaðar, nafns og almenns skyldleika við Krossnesinga eignaðist Úlfar Jökull kind sem ber nafnið Fjalla-Flekka.

Í Svínadal

2009-12-10T09:26:00.003Z

Við skruppum í Svínadal síðasta sunnudag. Með í för var Ása amma og Ylfa Rún og ég og guttarnir tveir en Eyfi var slappur heima og afinn var slappur heima og svo höfðu vinna og próf truflandi áhrif á hin tvö. Við höfðum lengi látið okkur detta í hug að fara svona aðventuferð í sumarbústaðinn eina helgi fyrir jól og baka, föndra, prjóna, fara í pottinn, borða o.s.frv. en það varð úr að áðurnefnt gengi fór í dagsferð sem var í alla staði frábærlega heppnuð þó það hefði vantað nokkra lykilmenn. Hér er Óli Kalman en hann og þá sérstaklega Úlfar Jökull voru í skýjunum yfir þessu ferðalagi.

Fyrsti jólasveinninn

2009-12-01T08:57:00.002Z

Kúkaferð í Kringluna

2009-11-27T20:55:00.003Z

Ég hef ekki farið sérlega oft í Kringluna undanfarið og þaðan af síður Úlfar Jökull. Það hefur þó gerst og gerðist meira að segja í dag. Ég fór með strákana báða ásamt Iðunni Ásu og Ásu ömmu. Þetta varð náttúrulega kostuleg ferð og skemmtilegt en sem betur fer voru markmiðin með ferðinni voða léttvæg og fá. Í fyrsta lagi þurfti Úlfar að skoða allt jólaskrautið og fannst það frábært, sérstaklega stóra jólatréð -sagði bara vá vá! Enda amman búin að kenna honum vandlega hvað jólatré er. Við Iðunn skoðuðum aðeins í búðir milli þess sem þurfti að sýna Óla Kalmani athygli á meðan amman var í essinu sínu í ömmuhlutverkinu.

Svo segist amman halda að við þurfum að koma við á einhverju klósetti því ÚJE sé búin að kúka. Hún reyndar heldur það ekkert, hún er alveg viss! Og við á klósett (við=báðir strákarnir og iðunn og amma). Og í stuttu máli sagt var Úlfar Jökull sannarlega búinn að kúka, ekki bara í bleyjuna heldur líka í buxurnar og samfelluna og upp á bak og niður á hné! Og í einhverju ég-á-svo-stóran-strák og byrjunar-aðventu-kæruleysi hafði ég ekki tekið nein aukaföt með -glæsilegt! Þetta varð alveg 3 manna verk að skipta á barninu, kaupa ný föt svo úje þyrfti ekki að fara heim á bleyjunni einni saman, róa Óla sem vildi innilega fara að fá brjóst þegar þarna var komið sögu, svara í símann sem hringdi á versta tíma kúkalega séð o.s.frv. Þrátt fyrir slæmt útlit á tímabili þá gátum við skemmt okkur innilega yfir þessu öllu, t.d. á fólkinu sem átti leið inn á klósettið og næstum hrökklaðist út aftur út af kúkafýlunni en þetta var svoddan basl að við hnigum niður á næsta kaffihús um leið og við komum út af klósettinu og fengum okkur hressingu og hlógum.

Af þeim örfáu kringluferðum sem úlfar hefur verið neyddur í hefur svona kúkasprengja komið fyrir í tvígang, amman er á því að hann fái bara andlegt áfall á að koma þarna inn. Ég veit svo sem ekki með það en ég tek að minnsta kosti aukaföt með næst :D

Jólaskraut

2009-11-20T13:24:00.004Z

Hérna sést sumt af því sem ég hef verið að dunda síðustu daga á milli bleyjuskipta, þvottastússs, brjóstagjafa o.s.frv. Þetta fellur undið þemað "óbrothætt jólaskraut" sem verður í hávegum haft þetta árið og líklega nokkur næstu ár!

Önnur útgáfa

2009-11-20T13:19:00.003Z

Og svo eru þeir oftast bara alls ekkert mjög líkir, bræðrasvipur samt líklega. T.d. er annar kuldakreistingur og hinn algjör hitabelgur (sbr. myndirnar)...

Og meira barnatal :S

2009-11-20T13:07:00.003Z

Ein af aðalspurningunum þessa dagana er "Og eru þeir líkir?" þ.e. ÚJE og Óli Kalman. Mér finnst þeir venjulega alls ekki líkir en stundum finnst mér samt bregða fyrir svip á Óla sem minnir mig skuggalega mikið á myndir af Úlfari á svipuðum aldri - sérstaklega sofandi, þá er ég ekki frá því að þeir beri þess merki að vera undan sömu foreldrum...

endalaust barnatal

2009-11-16T16:03:00.002Z

Mér finnst þessi bloggsíða dálítið merkileg, ég skrifa ekki mjög reglulega og yfirleitt eru þetta bara myndir af guttunum mínum og ekki neitt merkilegt né fyndið en samt fæ ég helling af yndislegum kommentum og kveðjum. En mér finnst ég nú eiginlega þurfa að fara að skrifa eitthvað annað en alltaf bara fæðing og skírn og önnur fæðing og annar gutti mættur í heiminn...

Og ég skrifa líka mjög fátt um öll þau ævintýri sem gerast af og til. Það mætti því kannski halda að við gerðum ekkert nema eignast börn, fara í gegnum krabbameinsmeðferð og eignast svo fleiri börn. Hérna kemur því smá svona "fréttapakki"

- Við foreldrarnir og herra Úlfar Jökull fórum ásamt Ásu ömmu á Kardemommubæinn. Ég óð mjög blint í sjóinn með það hvernig þetta myndi ganga, þ.e. að fá úje til að sitja í 2 heila klukkutíma og fylgjast með einhverju sem hann myndi hvorki skilja upp né niður í. Í töskunni var því ýmislegt "varakitt"; seríos í poka, bangsinn eini sanni, snudda, mjólk í glasi og meira að segja súkkulaðirúsínur ef allt annað myndi klikka. Við vorum svo heppin að sitja á 2.bekk (þó þar sé vissulega mesti hávaðinn og eflaust auðveldara að verða hræddur í svona návígi) og viti menn?! Úlfar Jökull var örugglega stilltasta barnið í öllum salnum þó ég segi sjálf frá. 1,5 ára sat hann allan tímann, þá meina ég ALLAN TÍMANN og horfði á leikritið og fylgdist með öllu sem gerðist á sviðinu og var gjörsamlega hugfanginn af öllu. Varakittið var því að mestu ósnert nema hvað foreldrarnir laumuðust til að fá sér smá súkkulaðirúsínur ;)

- Úlfar er á leikskólanum alla morgna og er orðinn ánægður þar. Var ekki alveg að gúddera þetta framan af og grenjaði á hverjum morgni en nú er hann mjög kátur enda alltaf að gera eitthvað skemmtilegt. Eftir hádegi erum við svo þrjú í kotinu, það getur verið basl þegar þeir grenja til skiptis eða kúka í erg og gríð eða eitthvað svona gerist en yfirleitt gengur þetta ótrúlega vel og þeir alveg dýrðlegir

- Hann reynir að myndast við að tala stundum og notar ca 30-40 orð, mjög misgáfuleg. Það undarlegasta sem þó skilst er nafn litla bróður. Sá var alltaf kallaður Lilli áður en hann var nefndur Óli Kalman og Úlfar segir Lilli á mjög furðulegan hátt sem kunnátta mín í hljóðritun nær einfaldlega ekki yfir en er á þá leið að setja inn og út úr sér tunguna 2-3 og segja eitthvað sambland af "blöeleöleöl"

Sætuguttarnir á sjafnó

2009-11-12T09:03:00.001Z

Algjörlega kominn tími á fréttaflutning héðan!

2009-11-12T08:37:00.003Z

Skírnin er afstaðin og Lilli fékk nafnið Óli Kalman Eyjólfsson. Kalman er bara út í loftið, sá fyrsti til að heita þetta mun hafa verið Kalman landsnámsmaður í Borgarfirði, fæddur 850 og getið er í Landnámu. Það er ekki alveg jafn langt að sækja Óla-nafnið þar sem afi Óli ber það líka.

Skírnin var í Vesturbrún og gekk glimrandi vel. Óli Kalman svaf bara að mestu leyti í athöfninni en sjarmeraði prestinn alveg þegar hann gerði sér lítið fyrir og brosti út að eyrum er presturinn signdi hann! Veislan var líka fín, en helst til mikið af veitingum og okkur var eiginlega orðið bumbult í lok dagsins af öllu ofátinu (maður getur víst líklega frekar kennt sjálfum sér um). Við fengum líka fallegar og góðar gjafir, takk kærlega fyrir okkur elsku vinir:)

Og smá viðbót!

2009-10-27T22:25:00.002Z

Lilli að æfa sig á maganum

Lilli hjá ömmu Petu

Og Úlfar Jökull frekar ábúðarfullur að hjálpa til við böðunina

Vegna fjölda áskorana :D:D:D

2009-10-27T18:53:00.001Z

Eitt kvöld í síðustu viku var ég einstæð húsmóðir með tvo litla pjakka meðan Eyfi hélt fyrirlestur. Svo kom að brjóstagjöf og Úlfar varð aðeins ósáttur með að mamma væri ekki að leika svo mamman keypti sér smá frið með súkkulaðikexi. Ég veit ekki hvort mikið af súkkulaðinu ofan á kexinu komst í magann...

Þetta þykir skemmtilegt!

Litli maðurinn, sem kallaður er Lilli alla daga fær bráðlega nafn (þessar tvær myndir eru teknar fyrir þremur dögum fyrir þá sem vilja vita þetta nákvæmlega). Það gengur rosalega vel með hann og hann þykir koma þokkalega vel út úr vigtunum og öðrum læknisskoðunum.

Daglegt líf á sjafnó

2009-10-11T09:14:00.000+01:00

Litli molinn er mjög mikið fyrir að sofa -sérstaklega á daginn:) Tekur sig vel út í heimaprjónuðu ljósbláu alpaca vesti. Það er til svo mikið af heimaprjónuðum og hlýjum æðislegum ullarflíkum á svona lítinn mola að það er ekki séns að nota þetta allt saman. En ég reyni eftir fremsta megni og sem betur fer er kalt svo það þarf að klæða guttann.

Úlfar Jökull aftur kominn í ömmustólinn (finnst það rosa sport) að lesa bók og mér sýnist hann líka vera að gera "höfuð, herðar, hné og tær" svona í leiðinni.

Eyfi ofurpabbi með báða guttana!

En það tekur á að vera pabbi og nauðsynlegt að leggja sig dálítið af og til :)

Rok og kvef

2009-10-09T10:36:00.000+01:00

Jæja, það kom að því að leikskólapestirnar næðu í skottið á Úlfari Jökli. Hann er núna heima með 39°C og hor og svolítið mishress greyið. Þetta hefur verið dálítið erfið vika hjá honum því eins og aðlögunin á leikskólanum gekk vel í síðustu viku hefur komið smá bakslag í þessari og hann mótmælir því sárlega á hverjum morgni að fara á leikskólann og vera skilinn þar eftir. Á þriðjudaginn var hann í baði í vesturbrún og amman og ég og eyfi öll að horfa á hann og fylgjast með en það dugði ekki til því hann datt í baðinu og skall með efri vörina á baðkarsbrúnina. Það kostaði þvílíkan grát og öskur og blóð og vangaveltur um hvort tennurnar væru fastar ennþá. Við höldum að þær hafi sloppið en vörin slapp ekki við að bólgna upp í ca. þrefalda þykkt sína og síðan á þriðjudag hefur hann eiginlega minnt á Geir Haarde með svona furðulegan munnsvip!

Litli gaurinn er nokkuð góður, sefur töluvert mikið -sérstaklega á daginn en vill helst sofa uppí á nóttunni í stað þess að vera í vöggunni sinni. Hann er allur að skýrast og er nú farinn að horfa aðeins og fylgjast með umhverfinu og rembast við að þroskast eitthvað :)

OG sá eldri er ekki skilin útundan...

2009-10-03T14:42:00.001+01:00

Við fengum aftur balann úr vesturbrún til að geta sett litla molann í bað, ég hafði samviskusamlega skilað honum fyrir LÖNGU þegar Úlfar var farinn að sulla svo mikið að allt eldhúsið var á floti. Og mér hefur svo oft þótt leiðinlegt að hafa ekki bað til að skella Úlfari í þegar hann er úrillur og þreyttur á kvöldin en var alveg viss um að balinn kæmist ekki fyrir í sturtunni. En annað kom á daginn núna þegar við fengum balann aftur og ég loksins ákvað að prófa þetta. Og síðan þá fær Úlfar Jökull að fara í bað nánast daglega og er frekar kátur eins og myndirnar bera með sér...

Honum finnst áhugavert að glugga í Fréttablaðið af og til

og hefur það fyrir sið að henda hverri blaðsíðu fyrir sig á gólfið þegar hann hefur lesið hana!

Til samanburðar...

2009-10-03T14:29:00.000+01:00

Hér er mynd af litla i fyrstu baðferðinni sinni. Til samanburðar má fletta aftur í tímann á bloggsíðunni og finna mynd af Úlfari Jökli í sinni fyrstu baðferð. Ég held að með fyrsta barn sé oft ein aðalpælingin (og mjög ótímabær að mínu mati) hverjum barnið líkist og barnamyndir dregnar fram af hinum og þessum :) Ég held að núna sé aðalpælingin hins vegar hvort þeir bræður séu eða verði líkir og ég get alveg viðurkennt að ég spái í það af og til. Fyrst fannst mér þeir alveg ólíkir en ég er farin að játa að þeir eru hugsanlega bara pínu svipaðir, a.m.k. stundum. Samt virðist þessi litli ætla að verða eitthvað rólegri en eldri bróðirinn ef marka má þessa fyrstu vikur og hegðun í móðurkviði.

Annars erum við bráðhress og brött, förum í fjölskyldugöngutúra daglega en þess á milli erum við heima á sjafnó í rólegheitum með heitt á könnunni og bleyjustemmningu

Betra tóm...

2009-10-03T14:13:00.000+01:00

Litli (stóri) molinn okkar nýfæddur!

1 ár

2009-10-01T21:55:00.000+01:00

Í dag er heilt ár frá því Úlfar Jökull greindist með krabbamein. Ég hugsa stundum enn um þennan dag árið 2008 og ég man mjög vel hvernig mér leið og hvernig dagurinn en það er eiginlega bara ólýsanlegt hvernig það er að fá svona fréttir. Allt frá þessum rosalega degi hefur leiðin svo legið upp á við og eftir erfiðan vetur í fyrra er Úlfar Jökull dugnaðarforkur búinn að vinna sig í gegnum heila lyfjameðferð og er nú eins fínn og flottur gutti og hugsast getur!

Og svo er það litli molinn stóri. Hann er ekki alveg á því að næturnar séu ætlaðar til að sofa og finnst ástæða til að láta í sér heyra af og til með þeim afleiðingum að aumingja Úlfar Jökull hrekkur upp og er mjög misfljótur að sofna aftur. Í nótt voru til dæmis allir á sjafnó vakandi um 3 leytið og enginn virtist vera á því að sofna nema jú foreldrarnir! Það virðast margir vilja koma og sjá gripinn en færri hafa látið verða af því. Ég segi bara að ef einhver vill sjá þetta barn þokkalega lítið þá er betra að drífa sig á svæðið því hann virðist ætla að stækka hratt og örugglega

Ætla að henda inn myndum þegar betra tóm gefst :)

Næstu stórfréttir!

2009-09-25T16:36:00.000+01:00

Það eru eintómar stórfréttir hér á blogginu okkar þessa dagana! Hjá okkur á Sjafnargötunni hefur fjölgað í fjölskyldunni því að morgni 22.septembers fæddist stór og stæðilegur litli bróðir. Til tilbreytingar fyrir foreldrana fór fæðingin af stað án gangsetningar en var engu að síður töluvert strembin þar sem snáðinn er engin smásmíði, 19,5 merkur og 54,5 cm og sneri höfðinu aðeins vitlaust og kom með ennið og andlitið á undan út en allt gekk ótrúlega vel!

Fjölskyldan er nú öll samankomin heima og öllum gengur vel að venjast þessum nýja mola og hann er óðum að venjast okkur líka. Ég held að það þýði lítið að reyna að útskýra svona stórviðburð nánar hér, læt myndir fylgja með sem tala sínu máli en þar fyrir utan verður fólk bara að líta inn í kaffi á Sjafnó við tækifæri og sjá þetta strákagengi hérna ;)

Smá stórfréttir

2009-09-11T22:38:00.000+01:00

Það er alltaf eitthvað skemmtilegt að frétta af okkur. Það stærsta er að Úlfar Jökull fór í myndatöku á þriðjudaginn síðasta, reglubundið eftirlit held ég að það kallist. Var svæfður eins og alltaf og stóð sig eins og 1 árs ofurgutta sæmir. Það besta var að myndirnar eru mjög jákvæðar, upphleðsla skuggaefnis á æxlissvæðinu virðist vera minni en á síðustu mynd og það er mjög mjög flott enda eru læknarnir og Sigrún hjúkka alveg í skýjunum með hann og hrósa honum í hástert. Nú hefur hann ekki verið á lyfjum síðan í feb/mars og ekkert virðist krabbameinsfrumunum hafa tekist að ná sér á strik á öllum þessum tíma svo það gefur tilefni til bjartsýni með framhaldið. Næsta myndataka er þá ekki fyrr en eftir 4 mánuði.

Eitthvað hefur sónarreikningum skeikað því þeir gerðu ráð fyrir að barn nr.2 kæmi í heiminn í dag en þar sem klukkan er að verða 22 eru tiltölulega litlar líkur á því að mati mín og Eyfa. Úr því sem komið er finnst mér best að halda því bara í bumbunni fram yfir helgina og gera sitthvað skemmtilegt og drífa mig svo í átökin einhvern tímann í næstu viku. Hvort ég nenni að skrifa eitthvað hér áður er alveg óvíst því "40 vikna meðgönguletin" er algjörlega búin að heltaka mig og ég geri helst ekkert annað en að sitja í sófanum og prjóna og prjóna og prjóna svo aðeins meira (og reyndar bókalestur, sund- og rólóferðir með Úlfari útisjúka). Afraksturinn er að hrúgast upp, 1 peysa á mig á viku núna í þrjár vikur og sú fjórða er á prjónunum og 5., 6., 7. o.s.frv. að mótast í kollinum á mér. Þær verða samt líklega að bíða fram yfir barnsburð...

Og bara pínku meira um sveppi!

2009-09-01T21:09:00.001+01:00

Og heima á Sjafnó hafa þurrkaðir kóngssveppir legið á borðstofuborðinu og hér er Úlfar Jökull mjög hjálpsamur og einbeittur að setja sveppina í krukku. Þetta hefur alveg dugað okkur sem ágætis morgunverk að dunda við.

Og í eldhúsinu gefur að líta dýrðina samankomna. Sveppir í krukkum í flestum hillum og bókin skammt undan, fleiri sveppi er svo að finna í skápnum og frystinum en þeir gátu því miður ekki fengið að vera með á myndinni! Í vetur verður svo höfuðáhersla lögð á svepparétti á Sjafnargötunni, sjálfboðaliðar í að borða með okkur sveppalasagne, svepparisotto, sveppabuff, sveppasúpu, sveppasósu með öllu mögulegu o.s.frv. eru velkomnir!

Meiri sveppir

2009-09-01T20:51:00.000+01:00

Í sveppaferð:

Þessir sveppir eru alveg málið, kóngssveppur sem telst einn sá allra besti!

Þessi mynd talar sínu máli!

Úlfari finnst líka berin mjög góð, hvort sem þau heita krækiber, aðalbláber, bláber eða hrútaber. Þá sest hann niður í lyngið og situr þar og tínir upp í sig, algjörlega sjálfum sér nógur þar til berin eru á þrotum.

Að kvöldi dags tók við sveppahreinsunin á heilu fjalli af girnilegum kóngssveppum. Hérna sést hluti fjölskyldunnar vinna hörðum höndum að hreinsuninni í sumarbústaðnum í Svínadal (verður líklega að teljast duglegri hlutinn í þessu tilfelli)

á meðan dekurdeildin þurfti nauðsynlega aðeins að prjóna pínulítið meira!

Sveppir - sveppir - sveppir

2009-09-01T20:36:00.000+01:00

Það er eiginlega nauðsynlegt að gera að minnsta kosti eina eða tvær sveppabloggfærslur af því að lífið snýst um sveppi á þessum tíma árs!

Í fyrsta lagi held ég að ég hafi hreinlega ekki getið þess hér að Ása amma (besta mamma í heiminum) gaf út sveppabók núna í sumar sem er bara hrikalega flott bók enda á öllum metsölulistum og rýkur út úr búðunum. Myndirnar í bókinni eru langflestar teknar af okkur Eyfa og mömmu og erum við dálítið montin af því. Fleiri virðast sammála um ágæti bókarinnar, sbr. http://jenfo.blog.is/blog/jenfo/entry/934553

11 dagar eftir eða svo...

2009-08-30T22:35:00.000+01:00

Af bloggleysinu að dæma mætti halda að það væri ekkert fréttnæmt af okkur á Sjafnargötunni. Það er nú samt eiginlega öðru nær og við erum bara hörkudugleg og athafnasöm. Eyfi er í 100% vinnu núna svo við Úlfar Jökull reynum að bralla eitthvað á hverjum degi og puða eitthvað. Flesta daga förum við í sund fyrir hádegi eða á róló og eftir hádegi gerum eitthvað annað skemmtilegt eða hittum einhverja sem nenna að líta við eða bjóða okkur að kíkja til sín.

Um helgina fórum við í sumarbústaðinn í Svínadalnum og gistum þar með Iðunni, Ylfu, Hirti, ömmu og afa og tíndum sveppi eins og við ættum lífið að leysa. Ótrúlegt en satt þá "sveif" ég um brekkurnar í Skorradal og þræddi mig gegnum skóginn með krakkann í maganum sem er víst bara alveg tilbúinn og mætti láta sjá sig hvenær sem er enda búinn að dúsa þarna inni í næstum 39 vikur! Reyndar býst ég ekki við honum alveg strax, enda á ég eftir að prjóna aðeins meira og nota afsökunina "ég er ólétt" aðeins meira áður en þetta er yfirstaðið. En forvitnin yfir kyninu veldur því nú samt að við erum að verða ansi spennt...

2009-08-13T11:01:00.000+01:00

Og svo myndir...

2009-08-13T10:46:00.000+01:00

Feðgar að hjálpast að við herbergisgerðina. Ég er ekki frá því að sá yngri eigi það til að líkast pabba sínum stundum!

Á rölti heim í hús aftur eftir að hafa gefið lömbunum, með pelana hvorn í sinni hönd og tók það ekki í mál að vera leiddur eða þiggja aðra hjálp.

Við mæðgin höfðum það fasta starf á Krossnesi þegar við vorum þar í sumar að gefa heimalningunum kvölds og morgna og okkur fannst það frekar skemmtilegt!

Upprennandi bóndastrákur

Eitt blogg á viku já :S

2009-08-13T10:36:00.001+01:00

Það virðist ekki alveg hafa tekist planið mitt um að blogga ca. einu sinni í viku í sumar. Það stafar bara af almennri leti og mjög skemmtilegu og líflegu sumri. Við Eyfi eigum svo hressan og lífsglaðan strák að það er alltaf eitthvað fyndið að gerast. Við erum búin að fara í nokkrar útilegur og ferðalög og vera á Krossnesi og ýmislegt bardúsað.

Úlfar Jökull dafnar mjög vel og er að því er virðist mjög hress og vel á sig kominn þrátt fyrir allt sem gekk á í vetur. Þessi lyf sem hann fékk voru náttúrulega algjört ógeð í rauninni og stórhættuleg og það er vitað að svona meðferðir geta haft síðbúnar afleiðingar en við hugsum ekki of mikið um það, enda ekki hægt annað en að dást að dugnaðinum í stóra stráknum okkar.

Já bráðum fer næsta kríli að kíkja í heiminn. Það ku vera ca 4 vikur í settan dag og ég væri bara alveg til í að það yrði ekki mikið lengra en það. Af því tilefni, og svo sem líka sökum aldurs, hefur Úlfar Jökull nú fengið sérherbergi og stærra rúm og alls kyns flottheit og sefur þar alsæll alla nóttina. Það þarf nú varla að taka fram hversu alsælir foreldrarnir eru með allan þennan nætursvefn!

Fyrsta útilega sumarsins

2009-06-29T14:00:00.000+01:00

Gaman að fíflast og knúsa pabba eftir útibleyjuskipti

Var það nokkuð búið að koma fram hérna að kókómjólk þykir góð? Svo góð að það þykir ástæða til að lygna aftur augunum...

Strandamaðurinn sterki tók sig til og vippaði næstþyngsta aflraunasteininum á stall!

Og yngri strandamaðurinn fylgdist með og æfði sína takta!

Ég held að svona á sumrin sé ég ekkert að setja metnaðinn á meira en svona ca 1 blogg á viku með skekkjumörkum.

Um helgina fórum við í fyrstu útilegu sumarsins. Það er þó ekki í fyrsta sinn sem Úlfar Jökull er í tjaldi því hann fór með okkur 3 mánaða á Breiðamerkursand í fyrrasumar svo hann er þaulvanur! Við fórum núna á Snæfellsnesið, gistum fyrri nóttina á Snorrastöðum. Þar eiginlega enduðum við hálfvegis inni í ættarmóti okkur til ekkert svo mikillar gleði en það skipti svo sem litlu máli. Við vorum vöknuð og farin á stjá svona upp úr kl.6 um morguninn og gengum á Eldborg. Við gerðum náttúrulega heilan helling á laugardeginum eins og sést á meðfylgjandi myndum. Tjölduðum svo seinni nóttina á Langaholti og nutum lífsins í botn. Það eru fullt af fleiri skemmtilegum myndum úr ferðinni, ég hreinlega átti bágt með að velja og hendi fleirum eflaust inn hingað bráðlega...

17.júní

2009-06-17T22:34:00.000+01:00

Ákvað að henda hér inn stuttu bloggi að kveldi 17.júní. Tókum gönguferð í bænum og tróðumst áfram eins og hinir í þvögunni, hittum hina og þessa og borðuðum ís á Ingólfstorgi með Ágústu Rut og foreldrum hennar. Sit núna með fætur uppi í loft og hlusta á uppþvottavélina og þvottavélina mala (elska það ;) ) og vafra um á netinu og hugsa aðallega um handavinnu.

Þó svo að það gangi ótrúlega vel með Úlfar Jökul og ekki mikil ástæða til að hafa verulegar áhyggjur af hans horfum eins og þetta lítur út núna, þá er eins og hugurinn minn sé mörgum mánuðum á eftir og ég er oft núna að velta ýmsu fyrir mér og hvernig þetta var í vetur. Ég held ég venjist því seint að litli stóri strákurinn minn sé búin með heila krabbameinsmeðferð og við séum í þessum sporum að hafa átt langveikt barn en kannski eru þessar staðreyndir að síast inn svona eftir á.

Annars er ég að hugsa um að tjá mig ekki meira um þetta í bili því ég hef ekki yfir neinu að kvarta.

Síðasta myndin í þessari lotu

2009-06-09T20:41:00.000+01:00

Þetta var svo staðan seinni partinn í dag, stóri duglegi strákurinn minn var bara lítill og aumur með hita og fann helst huggun í "Dýrunum á bænum" hjá Ásu ömmu